هڪ نظريو، جنهن جا ڦهلائيندڙ چون ٿا ته 9/11 وارو ٽريڊ سينٽر تي ڪرايل ”القاعده“ جو دهشتگرد جو حملو، دراصل آمريڪي صدر’جارج واڪر بُش‘ (2001-2009) ۽ سندس انتظاميا جي ڪوتاهين جو نتيجو آهي. هن نظريي ۾ اعتبار ڪندڙن جي دعويٰ آهي، ته مٿيئن واقعي بابت ”اصل سچائيءَ“ جي رڳو کين ئي خبر آهي، ٻين ماڻهن کي فقط ميڊيا مان مليل سطحي ڄاڻ آهي، جيڪي سندن تجزيي کي سمجهي نٿا سگهن، هن قسم جي ’سازشي سوچ‘ جي حمايت، صدر بُش طرفان ”نئين عالمي نظام“ کي هڪ ڄار يا ڪوڙڪيءَ سان پيٽيندڙ دانشور حلقي طرفان ٿئي ٿي. اهو حلقو سمجهي ٿو ته آمريڪا سان تعلق رکندڙ هڪ سگهارو ۽ ڪاروباري ذهن رکندڙ ٽولو سازشن ذريعي دُنيا تي حاڪميت قائم ڪرڻ گهري ٿو. 9/11 جي واقعي ۾ ان ٽولي کي شامل سمجهيو وڃي ٿو. ان سوچ ۾ ويساهه رکندڙن جو خيال آهي ته ’ورلڊ ٽريڊ سينٽر‘ تي آمريڪي اسٽيبلشمينٽ طرفان حملي ڪرائڻ جو اصل مقصد افغانستان ۽ عراق ۾ جنگيون شروع ڪرائڻ ۽ آمريڪا جي اندر شهري حق کسڻ جي لاءِ پُختو بهانو پيدا ڪرڻ هو. ان فڪري روش کي جڳ مشهور آمريڪي دانش- ور ’نوم چومسڪي‘ ۽ ساڻس سهمت حلقي جي حمايت حاصل آهي